බටහිර (යුරෝපීය) මායා මන්ත්‍ර ශාස්ත්‍ර (Witchcraft Magic Spells)

Witchcraft යනු අප අවට ස්වභාවධර්මයේ ඇති ගුප්ත ශක්තීන් භාවිතා කර ගෙන අපේ එදිනෙදා පහසුව, දියුනුව සහ සතුට වෙනුවෙන් යොදා ගැනීමයි. ඔබටම කල හැකි, ඉතා සරල සහ බලගතු (එමෙන්ම ආරක්ෂාකාරී) මායා මන්ත්‍ර සහ ගුරුකම් බොහෝමයක් අපි ඔබට ඉදිරිපත් කිරීමට බලාපොරොත්තු වනවා.

ඈත අතීතයේ සිටි මිනිසුන් ස්වභාව ධර්මයේ වෙනස් වීම් අවබෝධ කරගත නොහැකිව, ඒවාට බොහෝ භය තැතිගැන්ම ඇති කරගෙන, ඒවාට දේව සහ යක්ශ ස්වරූප (Archetypes) ලෙස විශ්වාස කලෝය. මේ අතර සිටි බුද්ධිමත් පිරිස ස්වභාව ධර්මයේ සෘතු වෙනස් වීම, සූර්යයාගේ, පෘථිවියේ සහ චන්දයාගේ ගමන් රටාව, සතුන් සහ ගස් කොලන් වල සෘතු සමග ඇති වන වෙනස් වීම් අවබෝධ කර ගත් හ. ස්වභාව ධර්මයේ ගුප්ත ශක්තීන් අවබෝධ කරගත් අය ලෝකය පුරාම පුරාන කාලයේ සිට ඔවුන් සමඟ සිටි ජනතාවගේ ගෞරවාදරයට පාත්‍ර වූහ. යුරෝපයේ, විෂේශයෙන් ම එංගලන්තයේ මේ අය "Wiccae" නමින් හැඳින්වුනි.

ශතවර්ශ ගනනාවක් තිස්සේ නොයෙකුත් බාධා මැද, බටහිර මායා මන්ත්‍ර ශාස්ත්‍ර එකතැන පල් නොවී දිනෙන් දිනම දියුනු විය. පෙරදිග, මැදපෙරදිග, සහ ඇමරිකාන-ආදිවාසී වැනි විවිධ ගුප්ත ශාස්ත්‍ර ක්‍රම වලින් සුදුසු දේ එකතු කර ගනිමින් විකාශනය වූ බටහිර මායා ශාස්ත්‍ර ක්‍රම අද ඉතා දියුනු මට්ටමක ඇත. ඒවා සමහරක් ඉතා පහසුවෙන් කල හැක. ඕනෑම මට්ටමක කෙනෙකුට අවබෝධ කර ගත හැක.

අපි ඔබට ඉදිරිපත් කරන්නේ ඉතාමත් ආරක්ෂාකාරී මායා මන්ත්‍ර ශාස්ත්‍ර. නමුත් අතිශය බලගතු යුරෝපීය ගුරුකම් ක්‍රම සමහරක් කිරීමට පෙර බොහෝ අත්දැකීම් තිබිය යුතුයි. ඔබ ආධුනිකයෙක් නම් Goetia, Solomonic Magic, Invocation, Santeria, Voodon වැනි අධි බලගතු ක්‍රම අත්හදා බැලීමෙන් වලකින්න. මේවා සම්බන්ධ පොත් ලියා ඇත්තෙ විෂේශ දැනුමක් බුද්ධියක් නැති කෙනෙකුට අවබෝධ කරගත නොහැකි ලෙසටයි.

මෙහිදී අප ඔබට ගෙන එන්නේ ආධුනිකයෙකුට වුවද පහසුවෙන් ආරක්ෂාකාරීව කල හැකි ක්‍රම. ඉටි පන්දම්, පලිඟු ගල්, කඩදාසි, සුවඳ දුම්, ජලය, ලුනු, මල්, පලතුරු, කුළු-බඩු වැනි ඔබට සොයාගැනීමට හැකි දේවල් භාවිතා කර මේවා බොහෝමයක් කල හැක.

ඇපල් ගෙඩියෙන් කරන මායා මන්ත්‍ර ශාස්ත්‍ර (Apple Spells)

ඇපල් ගෙඩිය සහ පෙති පහක් ඇති රෝස මල සංකේතාර්ථ වන්නේ රහස් දැනුම සහ බුද්ධියයි.

ඇපල් ලෙස අද කාලයේ අපි සලකන්නේ වඩා ජනප්‍රිය වූ ඇපල් පලතුර; නමුත් මධ්යකාලීන යුරෝපයේ ඇපල් ලෙස හැඳින්වූයේ පෙති පහක් ඇති, ඕනෑම, රෝස පවුලේ (Rosaceae - rose family) ගසකින් ලැබෙන පලතුරක්. එම නිසා මේ මායා මන්ත්‍ර ශාස්ත්‍ර සඳහා ඇපල් වැනි (මැද බීජ කෝෂ පහක් ඇති) ඕනෑම පලතුරු වර්ගයක් (පෙයාස් දෙළුම්, දාතුරා, තක්කාලි ආදී..) යොදාගැනීමේ කිසිම වරදක් නැහැ.

ඇපල් ගෙඩියෙන් කරන ගුරුකම් - කුරුලෑ, ලප නැති කරගැනීමට; සම පැහැපත් කර ගැනීමට

ඇපල් ගෙඩියක් ගෙන එය මැදින් හරහට කපන්න. මෙසේ කැපූ විට එහි ඇට සහිත කොටස පස් කොන් තරුවක් ආකාරයට පෙනේවි. එයින් එක් කොටසක් ගෙන ඔබේ මුහුනේ හෝ අවශ්‍ය ප්‍රදේශයේ සෙමින් අතුල්ලමින් මෙසේ කියන්න:

"ඇපල් ගෙඩියයි මේ, පූජනීය ඵලය දේවතාවියගේ, ඔබේ ත්‍යාගයයි මේ.."

"ස්පර්ශ කරමි මත, මේ කුරුලෑ/ලප, පන්නා දමමි මම..."

දැන් වෙනත් ඇපල් ගෙඩියක් ගෙන එය උඩ සිට පහලට, දික් අතට, දෙකට කපන්න. මෙයිනුත් එක භාගයක් ගෙන, ඒ අවශ්‍ය ප්‍රදේශයේ සෙමෙන් අතුල්ලමින්, මෙසේ කියන්න:

"සතුටුයි මා, ආලය කරමි, මගේ රුව මේ ඇති ලෙස.."

"පැහැපත් සම මා වෙත, ලබමි තව රුව සුන්දර"

"එයයි මගේ පැතුම, වේවා එය එසේම.." දැන් ඒ පලමු ඇපල් ගෙඩියේ භාග දෙක; පිටත ඇති ගසක්, මල් පැලයක් හෝ පඳුරක් මුල වල දමන්න. අනෙක් ඇපල් ගෙඩියේ භාග දෙක, ජලය ඇති තැනක, ඇලක් හෝ දොලක් ආසන්නයේ වල දමන්න. මෙය පුරපසලොස්වක දිනයක කිරීමෙන් වැඩි ප්‍රතිඵල ලැබේවි.

ඇපල් ගෙඩියෙන් කරන ශාන්තිකර්මය

අද අපි කරන්නට යන්නේ ඇපල් ගෙඩියකින් කරන ශාන්තිකර්මයක්, එය ඉතා සරල ගුරුකමක්. ඔබේ ජීවිතයේ, ශරීරයේ ඇති අහිතකර, නරක දෙයක් නැති කර ගැනීමට, දුරස් කිරීමට මෙය ඉතා සුදුසුයි, (නරක පුරුද්දක්, රෝගාබාධයක්, යම් පුද්ගලයෙක්, වැනි දෙයක් ඉවත් කර ගැනීමට).

මෙය කිරීමට සුදුසු කාලය වන්නේ චන්ද්‍ර මාසයේ 25 වන දිනයත් 28 වන දිනයත් අතරයි. එනම්, අමාවක දිනකට ආසන්නව, ඊට (සතියකට පමන) පෙර; පසලොස්වක දිනකට සති 3 කට පසු.

මෙම ගුරුකමට මන්ත්‍ර අවශ්‍ය නොවේ, වැදගත් වන්නෙ ඔබේ චිත්ත ඒකග්‍රතාවය, චිත්ත රූප දැකීමේ හැකියාව සහ අධිශ්ඨානයයි.

අවශ්‍ය ද්‍රව්ය:

• ඇපල් ගෙඩියක්
• ලුණු කුඩු (මේස ලුණු, මුහු දු ලුණු හෝ දිය ලුණු වුවද ගත හැක)
• ඇපල් ගෙඩිය මතුපිට කපා රූප ඇඳීමට හැකි කුඩා කටුවක්, හෝ පෑන-පිහියක්
• පොලවේ කුඩා වලක් හෑරීමට සුදුසු මෙවලමක් (උදැල්ලක් හෝ ඉස්කෝප්පයක්)
• අධිශ්ඨානය!

කරන ආකාරය:

• ඇපල් ගෙඩිය අත් දෙකෙන්ම ගෙන, හොඳින් ලං කරගන්න. සිත සන්සුන් කරගන්න.
• ඔබේ ජීවිතයෙන්, ශරීරයෙන් ඈත් කරගත යුතු දේ (නරක පුරුද්දක්, යම් පුද්ගලයෙක්, රෝගාබාධයක් වැනි දෙයක්) ගැන මෙනෙහි කරන්න.

කටුව හෝ කුඩා පිහිය ගෙන, ඇපල් ගෙඩිය මත සංකේත හෝ වචන වලින් ඔබට නැති කල යුතු දේ ගැන කපන්න. මේ අතරතුර එම දේ ගැන හොඳින් සිත යොමු කරන්න.

• ඉන් පසු, ඔබ කැමති, සුදුසු යැයි සිතෙන බල-සංකේත (පස් කොන් තරුව, දේවතාවියගේ චන්ද්‍ර සංකේතය, ශුද්ධ-වූ-ත්‍රිත්වය සංකේතය, පුරාණාක්ශර, යන්ත්‍ර)
• දැන්, ඔබ කැටයම් කල ඇපල් ගෙඩිය අතට ගෙන, හොඳින් නරඹමින්, ඔබේ ජීවිතයෙන්, ශරීරයෙන් ඉවත් කරගත යුතු දේ ගැන මෙනෙහි කරන්න.
• එම දේ ඔබේ ශරීරයෙන්, ජීවිතයෙන් ඉවත් වී ඇපල් ගෙඩිය තුලට ඇදී යන බව චිත්ත රූප වලින් දකින්න; නරක සියල්ල ඔබේ ශරීරයෙන් ඉවත් වී ඇපල් ගෙඩිය මගින් උරාගන්නා බව ඔබට දැනෙන්නට පටන් ගනීවි.
• දැන්, මේ ඇපල් ගෙඩිය වැලලීම සඳහා නිවසට හැකි තරම් දුරින් සුදුසු ස්ථානයක් සොයා කුඩා වලක් හාරන්න.
• වලේ පතුලට ලුණු ස්වල්පයක් ඉසින්න.
• ඉන් පසු, වල තුල ඇපල් ගෙඩිය තැන්පත් කර, තම අතින් ම පස් ගෙන වල වසන්න. පස් වලින් ඇපල් ගෙඩිය වැසෙන ආකාරය සහ පස් අතට දැනෙන ආකාරය ගැන සිහිය යොමු කරන්න.
• දැන්, වැසූ වල මතට වාමාවර්තව (ඔරලෝසු කටු කැරකෙන දිශාවට විරුද්ධ දිශාවට) ලුණු කුඩු ඉසින්න
• ඇපල් ගෙඩිය දිරාපත් වෙද්දී ලුණු මගින් එම අහිතකර ශක්තිය ඉවත් වී, නැවත ඔබ වෙත ඒම වලකී.

මෙය පෘථිවි ධාතුවට සම්බන්ධ ගුරුකමක්, ඒ නිසා මෙය ප්‍රතිඵල දෙන්නේ ටිකක් විතර හෙමින්. අග්නි ධාතුව හෝ වායු ධාතුව සම්බන්ධ ගුරුකම් සමඟ සන්සන්දනය කර බැලුවොත්, ඒවා ඉතා ඉක්මනින් පල දෙනවා. උදාහරනක් විදිහට මෙම කාරනය සඳහාම අග්නි සහ වායු ධාතු මගින් කිරීමට: ඔබට නැති කරගත යුතු දේ කොල කැබැල්ලක ලියා, කලු ඉටිපන්දම් දැල්ලකින් දල්වා අලු කර සුලඟේ යැවීම දැක්විය හැකියි. ඒත් එවිට ඉතා ඉක්මනින් ජීවිතයේ සිදු වන වෙනසක් ඔබට දැනේවි. විශාල වෙනසක් බලාපොරොත්තු වන විට සෙමින් ප්‍රතිඵල දෙන ගුරුකම් ක්‍රමයක් අත්හදා බැලීම නුවනට හුරුයි. ඔබේ ජීවිතයට ඇතිවන කුඩා වෙනසක් නම් ඉක්මනින් ප්‍රතිඵල දෙන ගුරුකම් ක්‍රමයක් යොදාගත හැකියි.

ඇපල් ගෙඩිය දිරාපත් වෙනවාත් සමඟ ඔබට ප්‍රතිඵල දැනෙන්නට පටන් ගනීවි.

ඉටිපන්දම් වලින් කරන මායා මන්ත්‍ර ශාස්ත්‍ර - Candle Spells

ඉටිපන්දම් වලින් කරන මායා මන්ත්‍ර ශාස්ත්‍ර (ගුරුකම්) ඉතා පහසුවෙන් මෙන්ම ඉක්මනින් කල හැකි අතර ඉතා සාර්ථක ප්‍රතිඵල බලාපොරොත්තු විය හැක.

ඉටිපන්දම් නිපදවීම සහ දැල්වීම ඉතා පුරාණ කාලයේ සිට පැවත එන කලාවක්. ඉටිපන්දමක් දැල්වීමෙන් එම වටපිටාවට අලංකාර බවක් එක් වනවා මෙන්ම, එහි පාට සහ හැඩය අනුව සංකේතාත්මක අර්ථයක් ගැබ් ව ඇත. ඉටිපන්දම් නිර්මානය කිරීම ද ඔබ සිතනවාට වඩා පහසු මෙන්ම විනෝදාත්මක ක්‍රියාකාරකමක්. ගුරුකම් සඳහා තමා විසින් ම ඉටිපන්දම් නිර්මානය කිරීමේදී එයට වැඩි බලයක් එක් කල හැක, එවිට වඩා සාර්ථක ප්‍රතිඵල බලාපොරොත්තු විය හැක. මෙහි ඇති පින්තූර වලින් පාට පහේ ඉටිපන්දම මා විසින් සෑදූ එකක්.

ඉටිපන්දම් මිලදීගැනීමේදී සෑම විටම අතින් සෑදූ ඉටිපන්දම් වඩා හොඳ බව මතක තබා ගන්න. යන්ත්‍රානුසාරයෙන් නිපදවන ඉටිපන්දම් වල පිට පෙනුම උසස් වුවත් එහි ගුණාත්මක බව අඩු, සහ මුදලෙන් වැඩි වේ. තවද, මායා මන්ත්‍ර ශාස්ත්‍ර සඳහා ඉටිපන්දම් මිලදීගැනීමේදී වඩා සුදුසු වන්නේ අතින් සෑදූ ඉටිපන්දම් ය. තරමක් මිලෙන් වැඩි වුවද, මී ඉටි වලින් තැනූ ඉටිපන්දම් මේවා සඳහා ඉතාමත් යෝග්‍ය වේ; ඒ කෙසේද යත්, මී ඉටි වඩා ස්වභාවික දව්යයක් වන නිසා යි. ඔබේ නිවසේ කුරුල්ලන් ඇති කරන්නේ නම්, පිරිසිදු මී ඉටි වලින් තැනූ ඉටි පන්දම් පමණක් භාවිතා කරන්න, පැරෆින් ඉටි පන්දම් වලින් පිට වන වාශ්ප කුරුල්ලන්ට විශ වන අතර මී ඉටි එසේ විශ නොවේ.

ඉටිපන්දම් දැල්වීමේදී සහ නිවීමේදී මතක තබාගත යුතු කරුණු (ගුරු මුශ්ටි)

ගුරුකම් සඳහා ඉටිපන්දම් දැල්වීමේදී කිසි විටෙක ගිනි කූරු පාවිච්චි නොකල යුතුයි. ගිනිකූරු වල ඇති ගෙන්දගම් නිසා ඔබේ ගුරුකමේ බලය හීන වේ. ඒ සඳහා ලයිටරයක් හෝ කුඩා ඉටිපන්දමක් පාවිච්චි කරන්න.

ඉටිපන්දමක් නිවීමට ඇඟිලි වලින් දැල්ල කඩා හෝ ඉටිපන්දමට පිඹීමෙන් වලකින්න. ඇඟිලි වලින් දැල්ල කඩා නිවීමෙන් එම කාර්යයට ඔබේ ඇති ආශාව සහ උද්යෝගී බව දුර්වල වේ, පිඹීමෙන්, ඔබේ එම ශක්තීන් ඔබෙන් ඉවතට යයි, එවිට නිසි ප්‍රතිඵල නොලැබී යා හැක. ඉටි පන්දමක් නිවැරදි ලෙස නිවීමට ඒ සඳහා ඇති උපකරනයක් (candle snuffer = ඉටිපන්දම් දැල්ල වසන කේතු ආකාර හිසක් සහිත ලෝහ හැන්දක් වැනි උපකරනයක්) භාවිතා කල හැකි අතර අතින් සුලං ගසා නිවීමද කල හැක.

නැවත පාවිච්චි කල හැකි ඉටිපන්දම් ආරක්ශිතව ගබඩා කර තබන්න, නමුත්, ගුරුකමක් සඳහා විෂේශයෙන් පාවිච්චි කල ඉටි පන්දමක් නැවත පාවිච්චි නොකර වැලලිය යුතුයි. ඔබට යමක් ඉවත් කර ගැනීමට, නැති කර ගැනීමට කරන ගුරුකම් සඳහා පාවිච්චි කල ඉටිපන්දම් ඔබේ ගෙවත්තෙන්, නිවසෙන් බැහැර තැනක වැලලිය යුතු අතර, ඔබට යමක් ලඟා කර ගැනීමට, ලබා ගැනීමට කරන ගුරුකම් සඳහා පාවිච්චි කල ඉටි පන්දම් ඔබේ ගෙවත්තේ, නිවස අසල, හෝ ඉඩමේ වලලන්න.

ගුරුකම් සඳහා පාවිච්චි කරන ඉටි පන්දම් වලින් වැටෙන ඉටි ද එකතු කර තබාගන්න. ඔබ තනන යන්ත්‍ර වලට, ඔබේ මුදල් පසුම්බියේ අඩියට දමා මේ ඉටි කැබලි තබා ගැනීමෙන් වාසනාව, සරු බව, සෞභාග්‍යය ලඟා වේ.

සරල අග්නි ගුරුකමක්

මෙය, ඔබට අවශ්‍ය දෙයක් පහසුවෙන් ලඟා කර ගැනීමට කල හැකි සරල ගුරුකමක්.

ඔබට අවශ්‍ය දෙයක් ලඟා කර ගැනීමට ගුප්ත ශාස්ත්‍ර යොදා ගැනීමේදී මතක තබාගත යුතු දේවල් කිහිපයක් ම තිබෙනවා

• "කිසිවෙකුටත් හානියක් නොකරන්න" යන පලමු නීතියට සෑම විටම ගරු කරන්න.
• ඔබට ලඟා කර ගැනීමට අවශ්‍ය දෙය වෙනත් අයෙකුට අයිති දෙයක් නොවිය යුතුයි.
• කිසි විටෙකත් එය පුද්ගලයෙකු නොවිය යුතුයි.
• අනෙක් අයගේ ස්වාධීනත්වයට, නිදහසට ගරු කරන්න.

එමෙන්ම, ඔබට අවශ්‍ය කරන දෙය පිලිබඳව පටු අදහසකින් සිතන්න එපා.

උදාහරනයක් ලෙස: ඔබට මුදල් ලඟා කර ගැනීමට අවශ්‍ය යැයි සිතන්න. ඔබට අවශ්‍ය "නිශ්චිත මුදල් ප්‍රමානයක්" (රු 10,000) ගැන සිතන්න එපා, ඔබට "අවශ්‍ය කරන මුදල" ලෙස සිතන්න. ඔබ විසින් ම සීමාවන් පනවා ගත්තේ නැතිනම් ඔබට අවශ්‍ය ප්‍රමානයට වැඩියෙන් මුදල් ලැබේවි. විශ්වය, ඔබ විසින් ඔබ මතම පනවා ගන්නා සීමාවන් ඉක්මවා නොයනු ඇත; එම සීමාවන් ඉවත් කල හැක්කේ ඔබට ම පමනයි.

තවත් වැදගත් කාරනයක් තමයි, ඔබ ගුප්ත ශාස්ත්‍ර වලට ආධුනිකයෙක් නම්, කුඩා දේවල් වලින් ආරම්භ කරන්න. ගුප්ත ශාස්ත්‍ර හොඳින් වැඩ කරන්නේ එය හොඳින් වැඩ කරන බව ඔබේ විශ්වාසයේ තිබුනොත් විතරයි. විශ්ව ශක්තිය වැඩ කරන්නේ ඔබේ සිතුවිලි සහ හැඟීම් වලට අනුවයි. ඔබේ සිතිවිල්ල, "මට කැඩිලැක් රථයක් අවශ්‍යයි"; ඒත් ඔබේ හැඟීම වන්නේ "මට එය ලබාගන්න බැහැ" ලෙස නම් එය සිදු වන එකක් නැහැ. කුඩා දේවල් වලින් ආරම්භ කර ඊට වඩා ඉහල දේ වලට ක්‍රමානුකූලව ඉදිරියට යාමෙන්, තමා විසින් ම පනවාගන්නා සීමාවන් වලින් බේරෙන්න පුලුවන්.

ඔබට අවශ්‍ය වන දේවල්

• ඉටිපන්දමක් [සුදු (රතු වුවද හොඳයි)]
• ලයිටරයක්, හෝ දැල්වූ කුඩා ඉටිපන්දමක්
• කඩදාසියක් සහ ලිවීමට (පෑනක් හෝ පැන්සලක්)
• ගින්නට ඔරොත්තු දෙන භාජනයක්, (මැටි මුට්ටියක් මෙවැනි දේ සඳහා වෙන් කර තබා ගන්න)
• පිහිය හෝ කෝටු කැබැල්ලක්

කරන ආකාරය

• මුලින්ම, හොඳින් හුස්මක් ගෙන සන්සුන් වන්න, පහසු ඉරියව්වකින් සිටින්න.
• දැන්, ඔබට ලඟා කර ගැනීමට අවශ්‍ය දේ ගැන සිතන්න.
• ඒ දෙය ඔබට ලැබුනු විට දැනෙන හැඟීම ගැන සිතන්න.
• මෙම සිතිවිල්ල පැහැදිලිව අරමුනු කර ගෙන මද වෙලාවක් භාවනා කරන්න. හැකිනම්, චිත්ත රූපයක් සිතේ තබාගන්න.
• කඩදාසිය ගෙන, ඔබේ අවශ්‍යතාවය ලියන්න.

පහත දැක්වෙන මෙයට අදාල මන්ත්‍රයේ වදන් වලට සමාන ලෙස ඔබට මෙය ලිවිය හැක.

• දැන්, ඉටි පන්දම දල්වන්න.
• නැවත, හොඳ හුස්මක් ගෙන සිත සන්සුන් කර ගන්න. ඉටිපන්දම් දැල්ල දෙස මද වෙලාවක් බලාගෙන චිත්ත ශක්තිය ඒකාංශ කර ගන්න.
• කඩදාසිය ගෙන, අවශ්‍ය නම් දෙකට නවන්න.
• ඔබේ පපුව මැද සුදු ආලෝක ගෝලයක් සිතින් මවා ගන්න.
• මෙසේ කියන්න: "මම, විශ්වයේ ශක්තිය සමඟ එක් වෙමි!"
• ඔබේ ඇස් වසාගෙන, ශරීරයෙන් ඉහලට නැඟ, පොලොවෙන් ඉහලට එසෙවෙන ආකාරයට චිත්ත රූපයක් සිතා ගන්න. ඉතා පහලින් පොලොව ඇති බව සිතා ගන්න.
• දැන් මෙසේ කියන්න:

"මුලු විශ්වයට පුරාම පැතිර ඇති යම් බලයක් වේද,
මමද එයින් ම හට ගත්තෙමි, එහි ම සම්පූර්ණව කොටසක් වෙමි."

• ඔබේ ඇස් ඇර, කඩදාසිය අතට ගන්න.
• මීලඟට, මෙසේ කියන්න:

"මුලු විශ්වයට පුරාම පැතිර ඇති යම් බලයක් වේද,
මමද එයින් ම හට ගත්තෙමි, එහි ම සම්පූර්ණව කොටසක් වෙමි.
මගේ අධිශ්ථානය ලෙස, මේ කඩදාසිය ගිනිගන්නා සේම,
එය එසේ වේනම්, මා ලියා ඇති දෙයද ඒ ලෙසම සිදු වේවා.
කිසිවෙකුටත් හානියක් නොවන ලෙස, පහසුවෙන් ම,
මා අධිශ්ථාන කරමි, මා වෙත ඇදගනිමි, ලබා ගනිමි,
භාරගනිමි, ස්තූතිවන්ත වෙමි, වේවා ස්තූති..
ඒ මාගේ අධිශ්ථානයයි, තීන්දුයි.."

• දැන් කඩදාසියට ගිනි දල්වන්න.
• දැල්වෙන කඩදාසිය වටා සුදු ආලෝක ගෝලයක් සිතින් දකින්න. ඉතා පැහැදිලිවත් දීප්තිමත් ලෙසත් මෙය දරා ගන්න.
• හැකි තරම් වෙලාවක් කඩදාසිය මෙසේ තබාගෙන සිට එය භාජනයට දමන්න. සම්පූර්නයෙන්ම අලු වන තුරු දවන්න.
• කඩදාසිය දැල්වෙන වේගය සහ ආකාරය අනුව ඔබේ කාර්යයේ සඵලතාවය ගැන අදහසක් ලැබේ. යම් කොටසක් නොදැවී ඉතිරි වුවහොත්, එම කොටස ගෙන නැවත මෙය කරන්න.

දැන් හොඳ හුස්මක් ගෙන ඔබේ සිත සන්සුන් කරගන්න, ශක්තිය මුදා හරින්න.

ඔබේ කාරනය ගැන දැන් සිතන්න එපා, එය ගැන සිතින් වද වීමෙන් එයට බාධා වේ. ඔබේ කාරනය ඉශ්ට වන බව ම දැනගන්න.

ඉටිපන්දම් වලින් කල හැකි ඉතා සරල මන්ත්‍ර ගුරුකමක්

ඔබේ අවශ්‍යතාවය (ධනය, ආදරය, විභාග ජය, ආරක්ෂාව, රැකියාවක්, යුක්තිය) අනුව වෙනස් කර ගත හැකි, බොහෝ ප්‍රයෝජනවත් වන, ඉතා සරල මන්ත්‍ර ගුරුකමකි මෙය. ඔබේ අවශ්‍යතාවය අනුව ඉටිපන්දමේ වර්ණය ආදිය තෝරාගන්නා ආකාරය ද අපි ඔබට කියා දෙන්නෙමු. වෙනත් කෙනෙකුට ජීවිතයට නරකක් සිදු නොවන ලෙස මෙය භාවිතා කරන්න.

ඔබට අවශ්‍ය වන කාරනය මෙහි සඳහන් නොවේ නම්, කරුනාකර මා අමතා ඒ ගැන විමසන්න පසුබට නොවන්න

මුලින්ම නිදහස්, නිස්කලංක ස්ථානයක් තෝරා ගන්න. ඔබට කුඩා මේසයක් අවශ්‍ය වේ. මන්ත්‍ර ශාස්ත්‍ර සඳහාම වෙන් වූ පූජාසනයක් නැතිනම්, පිරිසිදු කරගත් කුඩා මේසයක් තෝරා ගන්න.

සුදුසු වර්ණයකින් ඉටිපන්දමක්, සුදුසු සුගන්ධ තෙල් වර්ගයකින් බින්දු කිහිපයක්, සුදුසු මල්/ඖෂධ වර්ගයක් හෝ දෙකක් ආදිය සපයාගත යුතුයි. ඉටි පන්දමේ හැඩය එතරම් වැදගත් නොවේ. ඔබට අවශ්‍ය වර්ණය ම සොයා ගැනීමට නොහැකි නම් සුදු ඉටි පන්දමක් භාවිතා කරන්න.

ඔබට හැකි නම් සුදුසු පලිඟු ගල් වර්ග ද යොදා ගැනීමෙන් බලය වැඩි කර ගත හැක. ඉටිපන්දමේ සංකේත කැපීමට ඇනයක් (හෝ ගුරුකම් සඳහා වෙන් කර ගත් කලු මිට සහිත, තුඩ ඇති, තලය මොට පිහිය - Athame) ද අවශ්‍ය වේ.

ඉටි පන්දමේ වර්නය, සුගන්ධ තෙල්, සුවඳ දුම්, ඖෂධ වර්ග, පලිඟු ගල් වර්ග ආදිය තෝරාගත යුත්තේ ඔබේ අවශ්‍යතාවයට අනුව මෙම "Table of Correspondences" වගුවට අනුවයි.

දැන්, ඔබට අවශ්‍ය කාරණය කෙටියෙන්, (වචනයකින් හෝ දෙකකින්) ඉටි පන්දම මත ලියන්න. ඔබට ලඟා කර ගැනීමට අවශ්‍ය දෙයක් නම් ඉටිපන්දමේ ඉහල සිට පහලටත්; දුරස් කර ගැනීමට අවශ්‍ය දෙයක් නම්, පහල සිට ඉහලටත් ලියන්න. ඉදිරි ලිපි වලින් අපි ඔබට කියා දීමට බලාපොරොත්තු වන "බල සංකේත" මේ සමඟ භාවිතා කිරීමෙන් ඔබේ ගුරුකමේ බලය තවත් වැඩි කර ගත හැකි වේ.

මීලඟට, ඉටිපන්දමේ ඔබ තෝරාගත් සුගන්ධ තෙල් වර්ගයක් ආලේප කල හැක. මේ සඳහා තෙල් බින්දුවක් දෙකක් ප්‍රමානවත් වේ. ඔබේ කාරණය, ලඟා කර ගත යුතු දෙයක් නම් ඉටිපන්දමේ ඉහල සිට පහලටත්; දුරස් කර ගත යුතු දෙයක් නම් පහල සිට ඉහලටත් තෙල් ආලේප කරන්න.

දැන් ඉටිපන්දම මේසය මත සිටුවන්න. වෙනත් ඉටි පන්දමක උණු ඉටි බින්දු කිහිපයක් මත ඉටිපන්දම අලවා සිටුවිය හැක.

ඔබ තෝරාගත් ඖෂධ වර්ග සිහින් ව අඹරාගෙන ඉටිපන්දම වටා ඉසින්න. ඖශධ වර්ග ගැනීමේදී මදටිය ඇටයක තරමට ගැනීම ප්‍රමාණවත් වේ. අඹරාගත් ඖෂධ වර්ග ඉටිපන්දම වටා තැවරීමද කල හැක.

ඔබ තෝරාගත් පලිඟු ගල් වර්ග ඉටිපන්දම වටා තබන්න.

දැන්, හොඳ හුස්මක් ගෙන සිත සන්සුන් කර ගන්න. ඔබට අවශ්‍ය කාරණය ගැන සිතන්න. චිත්ත රූපයක් සිතේ දරාගෙන ඔබේ කාරණය ඉටු වූ විට දැනෙන හැඟීම ගැන මෙනෙහි කරන්න. දැන් ඉටි පන්දම දල්වන්න. ඉටිපන්දම් දැල්ල දෙස බලාගෙන චිත්ත රූපය ඒ තුලින් දකින්න. මෙසේ දකිමින් නැවත හොඳ හුස්මක් ගෙන සෙමෙන් හුස්ම පිට කරන්න.

හැකිනම් ඉටිපන්දම සම්පූර්ණයෙන් ම දැල්වෙන්නට ඉඩ හරින්න. ඉටිපන්දම "නිවැරදි ලෙස නිවා" තබා පසුව ඔබට පහසු වෙලාවක ඉතිරිය දැල්වීමටද හැක. ඉතිරි වන ඉටි හෝ ඉටිපන්දම් කොටස "නිවැරදි ලෙස වලළන්න".

ඔබේ කාරණය, ලඟාකර ගත යුතු දෙයක් නම්, පුර පසලොස්වක දිනට පෙර සතියේ දිනකත්; දුරස් කරගත යුතු දෙයක් නම්, අමාවක දිනට පෙර සතියේ දිනකත් මෙය කරන්න. වඩා සුදුසු දිනය තෝරාගැනීමට තවත් Table of Correspondences වගුවක් ඉදිරි කලාපයකින් අපි ඔබට ඉදිරිපත් කරන්නට බලාපොරොත්තු වනවා.

ඉටි පන්දම දැල්වෙන ආකාරයෙන් ඔබේ කාරණය ඉටු වන ආකාරය ගැන අදහසක් ගත හැක. උදාහරණයක් ලෙස, ගුරුකම ඉතාමත් සාර්ථක නම් ඉටිපන්දමක් තිබූ බව වත් සොයා ගැනීමට නොහැකි ලෙස, ඉටි බිඳක් වත් ඉතිරි නොවී සම්පූර්ණයෙන්ම දැල්වී ගිය අවස්ථා..; එමෙන් ම කාරණය සිදු නොවිය යුතු දෙයක් නම් නැවත නැවත උත්සාහ කලත් ඉටිපන්දම කෙසේ හෝ නිවී ගිය අවස්ථා මා අත් දැක ඇත. බොහෝ අන-වින, ඇස්වහ ආදිය තිබූ කෙනෙක් වෙනුවෙන්, එවා නැති කිරීම සඳහා මෙම ගුරුකම සිදු කල අවස්ථාවක ඉටි වලින් නාග හිසක් දර්ශනය වූ බවක් මා අසා ඇත. කෙසේ වෙතත් අන-වින, ඇස්වහ ආදිය නැති කිරීම වැනි කාරනයක් සඳහා මෙවැනි ගුරුකමක් කිරීමට පෙර, වඩා සරල දේවල් කිරීමෙන් හොඳ අත්දැකීමක් ලබා තිබිය යුතුයි. එවැනි ශාන්තිකර්මයක් ඉටිපන්දම් මගින් කිරීමට නම් යොදාගත යුත්තේ කලු ඉටිපන්දමකි. මෙය මැටි කෝප්පයක මැද/පතුලේ සිටුවා, එයට වතුර පුරවා ඉටි පන්දම දැල්විය යුතුයි.

පලිඟු සහ ගල් වලින් කරන මායා මන්ත්‍ර ශාස්ත්‍ර - Crystal and Stone Magic

සොබාදහමේ අපූර්ව නිර්මාණයක් වන පලිඟු බිහි වීමට අවුරුදු දස දහස් ගනනක් ගතවේ. ඛනිජ ද්‍රව්ය (විශේෂයෙන්ම සිලිකන්) රටාවකට අනුව එක මත එක තැන්පත් වීමෙන් මේවා හට ගනී. මෙසේ තැන්පත් වන සිලිකන් අතරට විවිධ ලෝහ වර්ග එක් වීමෙන් පලිඟු ස්පටික වලට විචිත්‍ර වර්ණ ලැබේ. එක සමාන දේවල් එකට ආකර්ශණය වීමේ සොබාදහමේ ගුප්ත බලවේගයට අනුව පලිඟු ද දීර්ඝ කාලයත් සමඟ ඉතා සෙමෙන් වර්ධනය වේ. පලිඟු හට ගැනීමේදී ඒ අවට පරිසරයේ ඇති පදාර්ථ සහ ශක්තීන් රටාවකට අනුව ඒ තුල ගැබ් වේ.

අප ශරීරයේ ප්‍රාණය ස්පන්ධ තරංග ලෙස පවතින ආකාරයට සමානව පලිඟු වලද ශක්ති ස්පන්දන ඇති වේ. පරිගනක යන්ත්‍ර, රේඩියෝ, ජංගම දුරකථන සහ උසස් තත්වයේ ඔරලෝසු වල කාලය මැනීමේ මූලික ස්පන්දන තරංග ලබා ගැනීමටද ඉතා කුඩා කෘතීම පලිඟු භාවිතා වේ. පලිඟු වල මේ ශක්ති ස්පන්දන වලින් අප ශරීරයේ ප්‍රාණ ශක්තිය නිවැරදි රටාවට අනුව හැඩගැස්වීමටද එමගින් ශාරීරික සහ මානසික සුවය ලඟා කර ගත හැකි බව ද සොයාගෙන ඇත.

මැණික් යනු ඉතා දුර්ලභ ගණයේ පලිඟු වර්ග වන අතර, මැණික් ගැරීමේදී ලැබෙන සුලභ පලිඟු වර්ග දුර්ලභ මැණික් වලට වඩා බොහෝ අඩු මිලකට සොයාගත හැක. සුලභ වුවත් දුර්ලභ වුවත් මැණික් සහ පලිඟු වල අඩංගු ස්වභාවික ශක්තීන් අතර වෙනසක් නැත. නොයෙක් අපල සඳහා බොහෝ දෙනා මැණික් ගල් සහිත ආභරන පලඳින බව ඔබ දැක ඇතිවාට සැක නැත, ඒ මැණික් වල ඇති සොබාදහමේ ගුප්ත ශක්තීන් වලින් ශාරීරික සහ මානසික සුවය ලඟා කර ගැනීමටයි. නමුත් අපේ සම්ප්‍රදායික ගුප්ත ශාස්ත්‍රඥයින් නියම කරන ඉතා මිල අධික මැණික් වර්ග සාමාන්‍ය ජනයාට මිල දැරිය නොහැකි නිසා ඔවුන් එම මැණික් වලින් ඉතා කුඩා කැබලි ආභරණ වලට එකතු කර ගනී. ඒත් එම ශක්තීන් ම ඇති පලිඟු වර්ග වලින් ප්‍රතිඵලදායී ප්‍රමාණයේ (මදක් විශාල) පලිඟු ගල් බොහෝ අඩු මිලට ඕනෑම කෙනකුට ලබා ගත හැක. මිල අඩු වුවද ප්‍රමාණයෙන් විශාල නිසා මේවාගෙන් වැඩි බලයක් ලබා ගත හැක.

අඩු මිලකට ලබා ගත හැකි පලිඟු වර්ග වලින් ඔබටම කල හැකි ප්‍රයෝජනවත් ගුප්ත මන්ත්‍ර ශාස්ත්‍ර බොහෝමයක්, මේ ලිපි පෙල තුලින් අපි ඔබට ඉදිරිපත් කරන්නට බලාපොරොත්තු වනවා.

පලිඟු ගල් වර්ග සහ ඒවායේ ප්‍රයෝජන

ව්යාපාර දියුනුවට - බ්ලඩ්ස්ටෝන්, මැලකයිට්, කොළ ටෝමලින්, කහ සර්කෝන්

සිහින - ඇමතිස්ට්, අසූරයිට්, කළු ඉරි සහිත සුදු ක්වාර්ට්ස් පලිඟු, ඕපල්

සූදු දිනීමට - ඇමේසනයිට්, ඇවෙන්චරීන්, කැට්ස් අයි

සතුට - ඇමතිස්ට්, ක්‍රරයිසොපාර්ස්, කහ සර්කෝන්

සෞඛ්ය/සුව-වීම - ඇගේට්, ඇම්බර්, ඇමතිස්ට්, ඇවෙන්චරීන්, අසූරයිට්, බ්ලඩ්ස්ටෝන්, කැල්සයිට්, කාර්නේලියන්, කැට්ස් අයි, සෙලෙස්ටයිට්, ක්‍රරයිසොපාර්ස්, කොරල්, ක්වාර්ට්ස් පලිඟු, දියමන්ති, ෆ්ලින්ට්, ගාර්නට්, හීමටයිට්, සිදුරක් සහිත ගල්, ජේඩ්, ජැස්පර්, ජෙට්, ලැපිස් ලසූලි, පෙරිඩොට්, සෆායර්, සොඩලයිට්, ගෙන්දගම්, සන්-ස්ටෝන්, ටොපෑස්, ටෝර්ක්විස්, රතු සර්කෝන්

ආදරය - ඇගේට්, ඇලෙක්සැන්ඩ්‍රයිට්, ඇම්බර්, ඇමතිස්ට්, බෙරිල්, කැල්සයිට්, ක්‍රයිසොකොල්ලා, එමරල්ඩ්, ජේඩ්, ලැපිස් ලසූලි, ලෙපිඩොලයිට්, මැලකයිට්, මූන්-ස්ටෝන් (චන්ද්රකාන්ති), ඔලිවයින්, මුතු, රෝඩොක්රොසයිට්, සෆායර්, සාර්ඩ්, ටොපෑස්, රෝස ටෝමලීන්, ටෝර්ක්විස්

ධනය, සෞභාග්‍ය - ඇවෙන්චරීන්, බ්ලඩ්ස්ටෝන්, කැල්සයිට්, කැට්ස් අයි, ක්‍රරයිසොපාර්ස්, එමරල්ඩ්, ජේඩ්, ඔලිවයින්, ඕපල්, මුතු, පෙරිඩොට්, රූබි, ලුනු, සෆායර්, ස්පිනල්, ටයිගර්'ස් අයි, ටොපෑස්, කොල ටෝමලීන්, දුඹුරු/රතු/කොල සර්කෝන්

ශාරීරික ශක්තිය - බෙරිල්, කැල්සයිට්, රෝඩොක්රොසයිට්, සෙලනයිට්, ස්පිනල්, සන්-ස්ටෝන්, ටයිගර්'ස් අයි, රතු ටෝමලීන්, රතු සර්කෝන්

ලිංගික ශක්තිය - කාර්නේලියන්, සන්-ස්ටෝන්, කහ සර්කෝන්

සුව නින්ද - මූන්-ස්ටෝන් (චන්ද්රකාන්ති), පෙරිඩොට්, නිල් ටෝමලීන්

දියුනුව - ඇමේසනයිට්, ක්‍රරයිසොපාර්ස්, මාබල් (කිරිගරුඩ)

ගමන්-බිමන් (ආරක්ෂාවට) - කැල්සෙඩොනි, තැඹිලි සර්කෝන්

බුද්ධිය - ක්‍රයිසොකොල්ලා, කොරල්, ජේඩ්, සොඩලයිට්, ඇමතිස්ට්

ආදරය ලඟා කර ගැනීමට සරල මායා මන්ත්‍ර ශාස්ත්‍රයක්

ඔබට සුදුසු ආදරවන්තයෙක්, ආදරවන්තියක් ලඟා කරගැනීමට මෙය කල හැකියි.

ගඟක්, ඇලක්, දොළක් වැනි ජලය ගලා යන තැනකින්, සුමට වූ මදක් විශාල පැතලි ගලක් සොයා ගන්න. ඔබට සුදුසු, ගැලපෙන සහකරුවකු/සහකාරියක ගැන චිත්ත-රූපයක් දකිමින් සහ සිතමින් මෙම ගල සොයාගන්න.

[image:http://public.kaputa.lk/user_files/ea/e9/c/witchcraft/intertwined_hearts.jpg] රතු පාට තින්ත වර්ගයකින් මෙම ගල මත හදවත් දෙකක් අඳින්න (රූපයේ පරිදි). මෙසේ අඳිද්දීත් කලින් විස්තර කල චිත්ත රූපයම සිතින් දකින්න උත්සාහ කරන්න.

දැන්, නිස්කලංක ස්ථානයක මෙම ගල වලලන්න.

ඔබේ චිත්ත-රූප වල අරමුන භූමියේ සහ ජලයේ ශක්තීන් මගින් ඉක්මනින් ඉටු වනු ඇත.

ගල් කැට පහෙන් කරන ආරක්ෂා මායා මන්ත්‍ර ශාස්ත්‍රය

ගඟක්, ඇලක්, දොළක් වැනි ජලය ගලා යන තැනකට යන්න. ජලය බැස යන දිශාවට මුහුනලා සිටගන්න. දොළෙන් කුඩා ගල් කැට පහක් අහුලා ගන්න. ඔබේ අවශ්‍යතාවය ගැන චිත්ත රූපයක් දකිමින් මෙම ගල් අහුලා ගන්න.

ඔබේ ඇඟිලි වලින් ගල් කැටය අල්ලන විට ඒවාගෙන් ශක්තිය රැස් විහිදෙන බව චිත්ත රූප දකින්න. මේ ගල් කැට අවුරුදු සිය දහස් ගනනක් තිස්සේ එකිනෙක ගැටි ගැටී, ගෙවී, ජලයෙන් ද සේදී; ඉතා සුමට බවත්, නමුත් ඉතා දෘඩ බවත් ලබාගෙන ඇත. ඒවා ඔබේ ආරක්ෂා කවචයට ශක්තිය එක් කරනු ඇත.

දැන් මේ ගල් කැට පහ කුඩා පසුම්බියක දමා නිතරම ඔබ ලඟ තබා ගන්න.

නිවස ආරක්ෂාවට කරන මායා මන්ත්‍ර ශාස්ත්‍රය

ඕනෑම නිවසකට ආරක්ෂාව සඳහා මෙම ගුරුකම කල හැක. මේ මායා මන්ත්‍ර ක්‍රමයේදී අපි භාවිතා කරන්නේ ස්වභාවධර්මයේ ඇති ඉතාම දෘඩ වස්තුවක් වන ගලක්. මැදින් හිලක් ඇති ගලක් සොයාගැනීමට හැකි නම් මේ සඳහා ඉතාමත් යෝග්‍ය වේ.

ඔබේ අත මිට මෙලවූ විට තරම් ප්‍රමාණයේ සුමට ගලක් සොයා ගන්න. මෙය හොඳින් සෝදා පිරිසිදු කරගෙන ඔබේ පූජාසනය හෝ කුඩා මේසයක් මත තබන්න. ගලට එක් පසකින් ජලය පීරිසියක් සහ අනෙක් පසින් මේස ලුනු පීරිසියක් තබන්න. ගල පිටුපසින් කළු ඉටිපන්දමක් දල්වන්න.

ලුනු ස්වල්පයක් ගෙන ගලට ඉසිමින් මෙසේ කියන්න

"මේ ලුනු වල පිරිසිදු කිරීමේ බලයෙන් මම මේ ගල කැප කරමි" ජලය ස්වල්පයක් ගෙන ගලට ඉසිමින් මෙසේ කියන්න

"මේ ජලයේ පිරිසිදු කිරීමේ බලයෙන් මම මේ ගල කැප කරමි" දැන්, ගල අතට ගෙන ඉටිපන්දම් දැල්ලට ඉහලින් යවමින් මෙසේ කියන්න

"මේ ගිනි දැල්ලේ ආකර්ශණ බලයෙන් මම මේ ගල කැප කරමි" අන්තිමට, ඔබේ ඇඟිල්ලෙන් ගල මත ඇසක් අඳිමින් මෙසේ කියන්න

"මගේ (අපේ) නිවස අවට බලා ආරක්ෂා කිරීමට මේ ගලෙහි ශක්තියට මම ආරාධනා කරමි. මෙතැන රැඳෙව්; සියලු නපුරු බලවේග, සිතිවිලි මෙතැනින් නැවතී මා (අප) ආරක්ෂා කර" දැන්, ඉටිපන්දම නිවන්න. ඉතිරි ජලය සහ ලුනු ගෙයින් පිටතට දමන්න. ගල, ගෙදර ප්‍රධාන දොර ආසන්නයේ තබන්න.

මාසයකට වරක් අමාවක දවසට මේ ගල ගෙය තුලට ගෙන එයට ස්තූති කරන්න. ස්තූතිවන්තව උනුසුම් ජලයෙන් සබන් දමා මේ ගල හොඳින් සෝදන්න. නැවත උනුසුම් ලුනු වතුරෙන් ද සෝදන්න. ඉන් පසු ඔබේ ඇඟිල්ලෙන් ගල මත ඇස අඳිමින් එම මන්ත්‍රය නැවත කියන්න. ඉන් පසු ගල නැවත දොර ලඟ තබන්න.

අනාවැකි කීමේ සහ රහස් දැනීමේ ශාස්ත්‍ර

අනාවැකි කීමේ සහ ගුප්ත දේ දැනගැනීමේ ශාස්ත්‍රයන් ගුප්ත ශාස්ත්‍ර වල ඉතා වැදගත් කොටසක්. කෙනෙකුට ගුප්ත ශාස්ත්‍රඥයෙක් වීමටනම් රහස් දැනීමේ ශාස්ත්‍ර එකක් හෝ දැන සිටිය යුතුයි. සාර්ථක රහස් දැනීමේ ශාස්ත්‍රයක් නම් අහඹු බව පදනම් වූත්, බොහෝ අහඹු නොවූත් එකක් විය යුතුයි. තාරකා ශාස්ත්‍රය මේ සඳහා සුදුසු නොවන්නේ ග්‍රහ තාරකා ආදීන් ගේ ස්ථීර වූ පථයන් මත පදනම් ව අහඹු වූ සිදුවීම් ප්‍රකාශ කල නොහැකි නිසා. නමුත් යම් කටයුත්තක් සඳහා සුදුසු හෝරාවක් සෙවීම, හෝ යම් සිදුවීමක (උපත) වෙලාව අනුව ලැබෙන සුභ/අසුභ පලාඵල කීමට ජ්‍යෝතිශ්‍ය සුදුසුයි.

ගුප්ත තොරතුරු දැනීමේ ක්‍රම බොහෝමයක් ඇත. අංජනම් බැලීම, කනප්පු පෙරැලීම ආදිය දේශීයව දැකිය හැකි මෙවැනි ක්‍රම වේ. මේවා සම්බන්ධ රහස් ඒ ඒ ශාස්ත්‍රයන් දන්නා අයගෙන් ම ඉඟනගැනීම සුදුසු හෙයින්, අප මෙහිදී සාකච්චා කිරීමට බලාපොරොත්තු වන්නේ බටහිර ගුප්ත රහස් දැනගැනීම ක්‍රම වන ටැරෝ කාඩ්, අවලම්භ (බට්ටා) ආදී ක්‍රම. සාර්ථක ලෙස රහස් දැනගැනීම සඳහා මේ ‍ක්රම (යාන) කිහිපයක් එක විට භාවිතා කල හැක.

අනාගතය යනු තවම සිදු වී නොමැති දේවල්. එනම් තවම මේ භෞතික [ත්‍රිමාණ] විශ්වය මත හටගැනීමට ලක් නොවුන දේවල්.

ඔබ චිත්‍රයක් අඳින්න සිතුවා යැයි උපකල්පනය කරමු. ඔබ ඒ චිත්‍රය අඳින්න පෙර ඒ චිත්‍රය මේ ලොකයේ පහල වී නෑ. එසේනම් එය ඔබ අඳින තුරු ඇත්තේ කොහේද. ඔබ නිර්මාණය කරන දේ නිර්මාණය කිරීමට පෙර ඇත්තේ ඔබේ මනස තුලමයි. මුලින් ඔබේ මනස තුල නිර්මාණය කල දේ ඉන් පසුව ඔබ මේ ලෝකය තුලට ගෙන එනවා.

ඔබේ මනස තුල ගොඩනඟන චිත්ත රූපය වෙනත් මානයක පවතින්නේ. ඒ මානයේ පදාර්ථ නැත. ඒ මානය ඔබේ මනස තුලම පමණක් පවතින දෙයකුත් නෙමෙයි. ඒ මානය තුල ඔබ යම් නිර්මාණයක් කර එය මේ ලෝකයට ගෙන නොආවේ නම් වෙනත් පුද්ගලයෙකුගේ මනසට එය ඇතුල් වී ඔහුගේ අතින් එය භෞතික ලෝකයට පැමිණිය හැකියි. නමුත් ඔබේ මනසින් නිර්මාණය කල ච්ත්ත රූපය ඉතාම නිවැරදි ආකාරයට භෞතික ලෝකයට ගෙන ආ හැක්කේ ඔබටම පමණයි.

අනාගතය දැකීම යනු, මේ භෞතික ලෝකයේ හටගැනීමට ලක් නොවුන මට්ටමේ ඊතරික මානයේ ඇති වස්තූන් සහ සිදු වීම් දැකීමයි. මේ ඊතරික මානය කඔස් [Kaos] නම් ස්වභාවයෙන් යුක්තයි (අපේ භෞතික විද්යාත්මක නියමයන් වලංගු නොවේ). එහි ඇති වස්තූන් ගේ ස්වභාවය ගැන කිවහොත් ඒ වස්තූන්ගේ ස්කන්ධය වනාහී භෞතික විශ්වය තුල හඳුන්වන සම්භාවිතාවයට සමානුපාතික වේ. කඔස් ස්වභාවය යනු මනුශ්යයාගේ මනසටද පොදු වූ ස්වභාවයක්. අලුත් අලුත් දේ බිහි වන්නේ මේ ස්වභාවය තුලින්.